Tennis-boltar hafa vakið óhug íbúa áströlsku borgarinnar Cairns, eftir að þeir fóru að gera vart við sig fyrir framan mörg hús. Sumir óttast að glæpamenn séu að nota boltana til að eyrnamerkja ákveðin hús sem sérstök skotmörk. Yahoo News Australia fjallar um málið.
Umfjöllun um málið hófst á Facebook, eftir að íbúi benti á dularfullan tennis-bolta sem var á bílastæðinu fyrir framan húsið sitt. Hún sagðist hafa lent í nákvæmlega þessu sjö sinnum.
„Gæti þetta verið einhverskonar merking, eða er ég bara hrædd?“ spurði íbúinn. Hún útskýrði að hvorki dýr né börn ættu það til að leika á lóðinni sinni, og tók fram að hundar í nágreninu væru alltaf í bandi.
Lögreglan sagðist ekki hafa neinar vísbendingar sem bentu til þess að glæpamenn væru að verki, en þrátt fyrir það fóru fleiri íbúar að segja frá sinni upplifunn:
„Ótrúlegt að þú skulir segja þetta því ég hef verið að fara í göngutúra með sjö ára gamalli dóttur minni sem hefur hvað eftir annað bent mér á tennis-bolta fyrir framan hús.“
„Sérstakt. Ég fann tennis-bolta á bílastæðinu okkar í dag. Það er algjörlega út í hött og mér fannst það skrýtið.“
Fleiri ummæli sem þessi mátti finna á Facebook og fór fólk að segja að málið væri „Mjög dularfullt“.
Þá fóru tilgáturnar að hrannast upp, þá sérstaklega hvernig glæpamenn gætu mögulega verið að nýta sér þá. Einhverjir héldu að húsin með tennis-boltum væru merkt því þar væru hundar og aðrir veltu því fyrir sér hvort glæpamenn köstuðu tennis-boltum í bíla til að athuga hvort þeir væru með þjófavörn. Enn aðrir bentu á að tennis-boltar sæjust mjög vel í myrkri, og það hentað þjófum sem starfa um nætur litist þeim sérstaklega vel á eitthvað hús.
Á móti kemur sagði einn hundaeigandi að hundurinn sinn skyldi stundum eftir tennisbolta fyrir framan hús ókunnugra.
Líkt og áður segir hélt lögreglan því fram að engar nægilega góðar vísbendingar bentu til þess að hér væri um eitthvað glæpsamlegt að ræða, en hvatti þó íbúa til að hafa samband teldu þeir að eitthvað gruggugt væri á seiði.