Bandarískur vinnumarkaður á erfitt með að komast í gang vegna heimsfaraldurs kórónuveirunnar og því fá margir launþegar að kenna á. Í síðustu viku sóttu 793.000 manns um atvinnuleysisbætur en voru 812.000 í vikunni á undan. Í heildina eru um 20 milljónir skráðir atvinnulausir í landinu samkvæmt opinberum skrám en rauntalin er væntanlega mun hærri.

Nefnd hagfræðinga hafði spáð því að 757.000 myndu sækja um atvinnuleysisbætur í síðustu viku. Tölurnar benda til að bandarískt atvinnulíf eigi í erfiðleikum með að komast aftur í fullan gang á meðan heimsfaraldurinn geisar.

Joe Biden, forseti, vinnur nú að því að fá þingið til að samþykkja stóran hjálparpakka upp á 1.900 milljarða dollara. Er honum ætlað að styðja við fyrirtæki, sem eru illa stödd út af faraldrinum, og atvinnulausa.