CNN segir að hinir slösuðu hafi allir verið lagðir inn á sjúkrahús. Að auki slösuðust margir til viðbótar lítils háttar en þurftu ekki að leggjast inn á sjúkrahús.
Vettvangurinn náði yfir margar götur, bæði gangstéttir og akbrautir. Hringingum rigndi inn til neyðarlínunnar þegar atburðarásin hófst.
Ökumaðurinn hélt áfram að aka á fólk allt þar til að bifreið hans, Honda Element, var orðin svo skemmd að ekki var hægt að aka henni lengra. Þá reyndi hann að hlaupa á brott en talsmaður lögreglunnar sagði að vitni hafi þá eiginlega króað hann af og haldið honum þar, þar til lögreglan kom og handtók hann.
Lögreglan hefur ekki veitt neinar upplýsingar um hver hinn handtekni er eða af hverju hann ók á fólkið.
