Í kjölfar árásarinnar á bandaríska þinghúsið í síðustu viku hefur mikill pólitískur órói verið í landinu, aðallega innan Repúblikanaflokksins. Nú hafa mörg stórfyrirtæki hætt fjárstuðningi við þingmenn flokksins vegna málsins. En það er ekki aðeins vegna árásarinnar og meintrar hvatningar Donald Trump, forseta, til stuðningsmanna sinna um að ráðast á þinghúsið sem fjárstuðningnum er hætt. Það spilar einnig inn í að margir þingmenn Repúblikana greiddu atkvæði með ógildingu úrslita forsetakosninganna.

CNN skýrir frá þessu. Fram kemur að til dæmis hafi stórbankinn Citigroup hætt fjárhagslegum stuðningi við þingmenn Repúblikana. Það sama á við tryggingafyrirtækið BlueCross Blue Shield og hótelkeðjuna Marriott. Þá hefur netrisinn Google einnig bæst í þennan hóp.

„Við höfum tekið þessa eyðileggjandi atburði við þinghúsið, sem áttu að grafa undan löglegum og réttlátum kosningum, til skoðunar og munum því hætta fjárstuðningi við þá sem greiddu atkvæði gegn því að niðurstöður kosninganna yrðu samþykktar,“ segir í yfirlýsingu frá Marriott.