Víða um heim vinna vísindamenn hörðum höndum við að þróa bóluefni gegn kórónuveirunni sem veldur COVID-19. En aðrir vinna að öðrum mikilvægum verkefnum tengdum heimsfaraldrinum. Þar á meðal eru vísindamenn við Syddansk háskólann sem í samvinnu við líftæknifyrirtækið Bioporto reiknar með að geta innan fárra mánaða kynnt til sögunnar kórónuveirupróf sem er hægt að nota heima og kemur með niðurstöðu á um 10 mínútum.

TV2 Fyn skýrir frá þessu. Fram kemur að nú taki það að jafnaði 24 til 48 klukkustundir að fá svar úr sýnatökum en markmiðið sé að stytta tímann niður í 10 mínútur.

Sýnatakan fer fram með því að sýni er tekið úr aftasta hluta munnsins með þar til gerðum pinna eða sköfu sem er síðan stungið ofan í vökva og eftir aðeins fimm til tíu mínútur liggur svarið fyrir.

Sótt verður um flýtimeðferð hjá heilbrigðisyfirvöldum svo hægt verði að taka þetta nýja verkfæri í notkun fyrir áramót en vinnan við það er nú á lokametrunum.