Bandaríska flugfélagið Delta vill að 3.000 af þeim flugliðum, sem starfa hjá félaginu, fari í ólaunað orlof í 4 til 12 mánuði. Félagið á eins og svo mörg önnur flugfélög í miklum rekstrarörðugleikum vegna heimsfaraldurs kórónuveirunnar og þarf að reyna að lækka rekstrarkostnaðinn.

Um 20.000 flugliðar starfa hjá félaginu og vonast stjórnendur þess til að 3.000 þeirra, hið minnsta, séu reiðubúnir til að fara í ólaunað orlof. Þeir segja þörf á því til að félagið komist í gegnum heimsfaraldurinn.

Velta Delta dróst saman um 91% á öðrum ársfjórðungi miðað við sama tíma í fyrra. Tap félagsins á fjórðungnum nam 3,9 milljörðum dollara.

17.000 starfsmenn hafa sjálfviljugir hætt störfum hjá félaginu eftir að heimsfaraldurinn skall á. Þar af eru rúmlega 1.700 af 7.900 flugmönnum félagsins.