Bóluefnið gegn COVID-19, sem rússnesk yfirvöld hafa samþykkt, var aðeins prófað á 76 manns. Þetta kemur fram í fréttatilkynningu frá rússneska heilbrigðisráðuneytinu. Í henni kemur einnig fram að efnið hafi fyrst verið prófað á mörgum dýrum, þar á meðal nagdýrum og prímötum.

Allar dýratilraunirnar stóðust allar kröfur um öryggi og virkni bóluefnisins og því var hafist handa við að prófa það á fólki. Tveir hópar sjálfboðaliða tóku þátt í prófununum, 38 í hvorum.

Það var Vladímír Pútín, forseti, sem tilkynnti á þriðjudaginn að Rússar hefðu fyrstir þjóða samþykkt bóluefni gegn kórónuveirunni. Heilbrigðisyfirvöld samþykktu bóluefnið eftir tæplega tveggja mánaða tilraunir á mönnum.

Um allan heim vinna vísindamenn hörðum höndum að þróun bóluefnis gegn veirunni sem hefur nú borist í rúmlega 20 milljónir manna um allan heim.

Venjulega eru bóluefni ekki samþykkt til notkunar fyrr en að undangengnum prófunum á mörg þúsund manns. Af þessum sökum eru yfirvöld í ESB og Bandaríkjunum efins um rússneska bóluefnið og sömu sögu er að segja hjá Alþjóðaheilbrigðisstofnuninni WHO.