Rúmlega 8.000 starfsmenn Facebook hafa fengið „gott tilboð“ frá fyrirtækinu. Þeim er nú boðið að vinna heima fram í júlí á næsta ári. Til að freista fólks enn frekar þá fá starfsmennirnir sem svarar til um 130.000 íslenskra króna ef þeir taka tilboðinu.

En starfsmennirnir mega ekki fara og kaupa sér nýtt eldhúsborð eða brauðrist fyrir peningana því þá á að nota til að koma upp „heimaskrifstofu“.

Talsmaður Facebook sagði í samtali við Reuters að tilboðið væri byggt á mati sérfræðinga og umræðu innan fyrirtækisins og því hafi verið ákveðið að bjóða starfsfólki upp á þann möguleika að vinna heima þar til í júlí 2021.

Facebook er ekki eina fyrirtækið sem vill heimila starfsfólki að vinna heima því það hafa til dæmis Google og Twitter gert.