Framkvæmdastjórn ESB hefur samið við bandaríska lyfjafyrirtækið Gilead um kaup á lyfinu Veklury, sem er betur þekkt undir nafninu Remdesivir, fyrir 63 milljónir evra en það svarar til um 10 milljarða íslenskra króna.

Þetta kemur fram í fréttatilkynningu frá framkvæmdastjórninni. Í henni segir að framkvæmdastjórnin hafi unnið hörðum höndum að því í samvinnu við Gilead að ná samkomulagi sem tryggir nægar birgðir af fyrsta lyfinu sem hefur hlotið viðurkenningu sem lyf við COVID-19.

ESB keypti skammta fyrir um 30.000 sjúklinga og verður þeim deilt út til aðildarríkja sambandsins og Bretlands. Það er ætlað fyrir þá sem veikjast mest af COVID-19.