Síðdegis síðasta sunnudag kom til harkalegra deilna á Lille Strandvej í Hellerup í Danmörku. Ástæðan var að tveir ungir menn komu þar að pari sem var að stunda kynlíf í Suzuki Swift. Ungu mennirnir, sem eru 19 og 28 ára, gerðu vart við sig og bentu parinu í bílnum á að allir gætu séð hvað þau væru að gera og að það væri líklega góð hugmynd að hætta.

Parið, sem er um tvítugt, var ekki sátt við að vera truflað í miðjum klíðum og upphófust þá miklar og háværar deilur. Fjöldi fólks hringdi í lögregluna en áður en hún kom á vettvang lét parið sig hverfa á brott.

Ekstra Bladet hefur eftir talsmanni lögreglunnar að engin kæra hafi verið lögð fram vegna málsins og að enginn hafi meiðst. Lögreglan vill þó gjarnan hafa tal af parinu til að heyra hvað það hefur að segja um atburðarásina.