Kostnaðurinn sem fellur til vegna COVID-19 faraldursins mun væntanlega verða meiri en allur sá kostnaður sem hefur orðið vegna efnahagslægða og náttúruhamfara áratugum saman. Þetta segir Clemens Fuest, prófessor og forstjóri Ifo stofnunarinnar hjá Ludwig-Maximilian háskólanum í München, um efnahagslegar afleiðingar COVID-19 faraldursins í Þýskalandi.

Stofnunin hefur reiknað út nokkrar mögulegar sviðsmyndir sem sýna að í „besta falli“ sleppur Þýskaland með 7,2% efnahagssamdrátt en í versta falli verði samdrátturinn 20,6%. Í evrum talið svarar þetta til taps á milli 255 og 728 milljarða evra.

Gabriel Felbermayer, forstjóri Institut für Weltwirtschaft í Kiel, tekur í sama streng og segist óttast að Þýskaland standi nú á þröskuldi mesta samdráttarskeiðs sögunnar. Mánaðarlöng lokun samfélagsins, sem dragi úr framleiðslu um helming, kosti á ársgrundvelli 4 prósent hagvöxt. Tveggja mánaða lokun kosti 8 prósent hagvöxt. Svo mikinn samdrátt hafi Þýskaland ekki tekist á við á friðartímum.