Síðasta sumar var lögreglan í Osló kölluð í fjölbýlishús við Christian Michelsens götu í Torshov. Þar bjó 53 ára karlmaður í félagslegri íbúð. Hann hafði í maí 2018 beðið um að fá framlengingu á leigusamningi sínum en þegar hann hafði ekki enn skrifað undir nýja samninginn í ágúst 2019 var honum sent bréf um að hann yrði fljótlega borinn út úr íbúðinni. Hann svaraði því ekki og því fóru fulltrúar borgarinnar á vettvang en náðu ekki sambandi við manninn. Þeir sáu að póstkassinn hans var yfirfullur og höfðu því samband við lögregluna.

Lögreglumenn klifruðu upp á svalir og sáu inn um glugga að beinagrind var í svefnsófa í stofunni. Rannsókn lögreglunnar leiddi ekkert í ljós sem benti til að eitthvað glæpsamlegt hefði átt sér stað, til dæmis voru engin ummerki um innbrot.

Hinn látni hét Stein Erik Holst.

TV2 segir að niðurstaða réttarmeinafræðinga hafi verið að Stein hafi verið látinn í 428 daga áður en beinagrind hans fannst. Dánardægrið var sett 1. júlí 2018. Talið er að aldrei fyrr hafi liðið svo langur tími frá andláti í Osló þar til líkið eða beinagrind fannst. Ekki var hægt að skera úr um dánarorsök hans en engir áverkar voru á beinagrindinni.