Átta létust eftir að hafa drukkið handspritt í samkvæmi í Rússlandi eftir að áfengið var búið. Meðal þeirra látnu eru foreldrar fimm systkina sem nú eru munaðarlaus. Móðir þeirra, 48 ára, lést á fimmtudaginn og varð þar með áttunda fórnarlambið.

Eiginmaður hennar og fimm karlar á aldrinum 27 til 69 ára voru meðal þeirra fyrstu til að deyja. Einnig er 41 árs kona látin og einn aðili enn en ekki hefur verið skýrt nánar frá aldri viðkomandi eða kyni.

Fólkið var í samkvæmi í húsi í Tomtor þann 19. nóvember.  Þegar áfengið þraut byrjaði fólkið að drekka handspritt með þessum hörmulegu afleiðingum. Níundi maðurinn, sem er 32 ára, er enn á sjúkrahúsi og telja læknar að hann muni lifa þetta af en missa sjónina. Daily Mail skýrir frá þessu.