Það er óhætt að segja að tveggja daga ráðstefna, sem fór fram á Boston Marriot Long Wharf hótelinu í Boston í febrúar, hafi verið örlagarík. 175 manns sóttu ráðstefnuna en á þessum tíma voru ekki margir sem töluðu um andlitsgrímur, félagsforðun, lokanir samfélaga eða fjölda andláta af völdum kórónuveirunnar sem veldur COVID-19. Á ráðstefnunni kynnti lyfjafyrirtækið Biogen nýtt lyf við Alzheimerssjúkdómnum. Þegar spurt var út í óljósan orðróm um slæma veiru í Kína var svarið: „So far, so good“.

The New York Times skýrir frá þessu. Fram kemur að líklega hafi einn ráðstefnugestanna þá þegar verið smitaður af kórónuveirunni en hann hafi smitað flesta ráðstefnugesti áður en þeir héldu heim á leið. Nú hefur smitrakning leitt í ljós að ráðstefnan er stærsti „ofursmit“ atburður faraldursins. Hægt er að rekja á milli 205.000 til 300.000 smit til hennar. Í Flórídaríki einu saman er hægt að rekja 71.540 smit til ráðstefnunnar. Í heildina má rekja 1,6% af öllum staðfestum smitum í Bandaríkjum til hennar.

„Heimsfaraldur kórónuveirunnar hefur haft mjög bein og persónuleg áhrif á Biogen-samfélagið eins og hann hefur gert  víða um heim,“ segir í yfirlýsingu frá Biogen að sögn Boston Globe.

Smitin, sem tengjast ráðstefnunni, eru ekki bara bundin við Bandaríkin heldur bárust þau víða um heim. Til dæmis var fólk frá Ástralíu, Slóvakíu og Svíþjóð á ráðstefnunni og bar smit með sér heim.