Bandarísk heilbrigðisyfirvöld hafa um langa hríð varað við fjölgun dauðsfalla af völdum COVID-19 í kjölfar þakkargjörðarhátíðarinnar og síðan aftur í kjölfar jóla og áramóta. En margir virðast ekki hafa viljað hlusta á þessar viðvaranir því dánartölur hækka dag frá degi. Samkvæmt tölum Johns Hopkins háskólans frá í nótt þá létust rúmlega 3.000 af völdum sjúkdómsins sólarhringinn á undan.

Tölurnar miðast við frá klukkan 00.30 aðfaranótt miðvikudags til sama tíma í nótt, miðað við íslenskan tíma. Á þessum 24 klukkustundum létust 3.071 og þar með fór heildarfjöldi látinna af völdum COVID-19 í Bandaríkjunum í 289.188.

The Guardian segir að minnst 15.000 hafi látist af völdum COVID-19 síðustu vikuna og að rúmlega 2.000 hafi látist daglega síðustu tvær vikur.

Heildarfjöldi greindra smita í Bandaríkjunum er nú kominn yfir 15 milljónir síðan faraldurinn braust út.

Í gær lágu 106.000 COVID-19-sjúklingar á sjúkrahúsum landsins.