Þetta hófst sem hefðbundið eftirlitsflug hjá starfsmönnum Utah Department of Public Safety (almannaöryggisdeild ríkisins) á miðvikudag í síðustu viku. Eftirlitsferðin var farin í þyrlu. Þegar flogið var langt inn í eyðimörkina sá áhöfnin dullarfullan hlut standa þar. Hluturinn minnti áhöfnina einna helst á hlut úr kvikmyndinni „2001: A Space Odyssey“.

CNN skýrir frá þessu. „Einn af líffræðingunum sá þetta og svo vildi til að við flugum beint yfir þetta,“ sagði Bret Hutchings, flugmaður, í samtali við KSL. Þyrlunni var flogið aftur að hlutnum sem reyndist vera glansandi og silfurlitaður og stóð beint upp úr jörðinni, einskonar minnismerki.

Hutching sagði að ekki væri að sjá að tilviljun hefði ráðið því að hluturinn væri þarna, svo virtist sem honum hefði verið komið fyrir þarna af ásettu ráði. Hann sagðist telja líklegt að listamaður hefði komið honum fyrir þarna, það væri að minnsta kosti líklegra en að vitsmunarverur frá öðrum plánetum hefðu verið að verki.

Í fréttatilkynningu frá almannaöryggisdeildinni segir að óheimilt sé að reisa byggingar eða setja upp listaverk á opinberum landareignum án þess að fá leyfi til þess.  Verið er að skoða hvort málið verði rannsakað frekar.