Hann sagðist telja að krafa sem þessi verði „almenn“ í fluggeiranum í framtíðinni. Hann sagði að félagið muni taka upp þessa kröfu um leið og bóluefni gegn veirunni er orðið aðgengilegt fyrir almenning.
„Við íhugum að breyta skilyrðum okkar og kröfum til farþega í alþjóðaflugi á þann hátt að þeir verði beðnir um að láta bólusetja sig áður en þeir fá að fara um borð í flugvélarnar,“ sagði hann. „Við verðum að sjá hvað gerist með COVID-19 áður en við getum sagt til um hvort þetta verður einnig tekið upp í innanlandsflugi en við teljum öruggt að þetta verði nauðsynlegt fyrir útlendinga sem koma til Ástralíu og fyrir fólk sem fer frá Ástralíu,“ sagði Joyce sem sagðist einnig telja líklegt að þetta verði krafa hjá flugfélögum um allan heim í framtíðinni. Yfirvöld og flugfélög víða um heim íhuga að taka upp rafræn bólusetningavegabréf.
Landamæri Ástralíu hafa verið nær lokuð síðan í mars vegna viðleitni yfirvalda við að takmarka útbreiðslu kórónuveirunnar. Yfirvöld hafa einnig takmarkað þann fjölda ástralskra ríkisborgara sem hafa fengið að snúa heim. Af þeim sökum hafa tugir þúsundir Ástrala setið fastir erlendis.
Qantas hefur lagt rúmlega 200 flugvélum og sagt rúmlega 8.500 starfsmönnum upp til að reyna að draga úr því mikla tapi sem stöðvun flugreksturs veldur.
