Þetta sagði Karin Samuelsson, dósent við læknadeild háskólans í Lundi, í samtali við Sænska ríkisútvarpið.
„COVID-sjúklingar fá fleiri martraðir og ofskynjanir en aðrir sjúklingar. Ástæðan er sá langi tími sem þeir eru á gjörgæsludeildum og að þeir fá sterkari lyf og að við neyðumst stundum til að stöðva öndun þeirra til að öndunarvélarnar virki,“
sagði hún og bætti við að tveir þriðju hlutar COVID-19-sjúklinga glími við martraðir en það sama eigi við um þriðjung sjúklinga sem eru lagðir inn á gjörgæsludeildir af öðrum ástæðum en með COVID-19 smit.
Alvarlega veikum COVID-19-sjúklingum er haldið sofandi án náttúrulegra draumfara en sjúkdómurinn hefur áhrif á líkamann og heilann. Það getur, í samblöndun við annasamt sjúkrahúsumhverfið þar sem slöngur eru tengdar við líkamann, aukið ótta sjúklinganna við að deyja. Einnig getur fjarvera náinna ættingja orðið til þess að sjúklingarnir fá martraðir að sögn Samuelsson.
Martraðirnar verða svo ofsafengnar hjá sumum sjúklingum að þeir byrja að fá ofskynjanir og eiga erfitt með að greina á milli drauma og raunveruleikans.
„Draumarnir eru mjög öflugir og eru oft endurteknir. Þetta getur valdið ofsóknarkenndum ranghugmyndum um að starfsfólkið vinni gegn þeim. Það getur valdið miklum vandræðum,“
sagði Samuelsson.
