Bæði Demókratar og Repúblikanar eru fúlir yfir að Facebook neitar að birta pólitískar auglýsingar í tengslum við kosningar um tvö öldungadeildarsæti í Georgíuríki. Kosið verður um sætin þann 5. janúar en niðurstöður kosninganna geta ráðið miklu um hvernig Joe Biden og ríkisstjórn hans tekst að koma málum í gegnum þingið því þær ráða því hvort Repúblikanar eða Demókratar verða í meirihluta í öldungadeildinni.

Facebook hefur ákveðið að leyfa ekki pólitískar auglýsingar næstu vikurnar. „Þrátt fyrir að margir hafi útnefnt sigurvegara teljum við enn mikilvægt að leggja okkar af mörkum til að koma í veg fyrir rugling og misnotkun á samfélagsmiðlum okkar,“ segir í tölvupósti sem Facebook sendi auglýsendum.

„Þetta er að gera okkur brjáluð,“ sagði Mark Jablonowski, hjá DSPolitical sem sér um stafrænar auglýsingar Demókrata. „Þeir halda í raun hinu pólitíska ferli í gíslingu,“ sagði Eric Wilscon, sérfræðingur hjá Repúblikönum.