Karl Nehammer, innanríkisráðherra Austurríkis, hélt fréttamannafund fyrir stundu þar sem hann sagði meðal annars að hryðjuverkamaðurinn, sem lögreglan skaut til bana í gærkvöldi, hafi verið með sprengjubelti og hafi verið stuðningsmaður hryðjuverkasamtakanna sem kenna sig við Íslamska ríkið. Hann var þungvopnaður að sögn ráðherrans.

Hann sagði einnig að talið væri að fleiri hafi verið að verki og að þeirra sé nú leitað. Lögreglan hefur nú þegar gert húsleit á heimili þess sem var skotinn og lagt hald á sönnunargögn. Árásir voru gerðar á sex stöðum í miðborginni.

„Að minnsta kosti einn íslamskur hryðjuverkamaður réðst á okkur í gær,“

sagði hann á fréttamannafundinum að sögn Sky News. Hann staðfesti einnig að þrír almennir borgarar hefðu látist og að fimmtán hefðu særst, sumir alvarlega.

Uppfært klukkan 07:07

Staðfest hefur verið að einn til viðbótar sé látinn. Fjórir almennir borgarar létust því í árásunum og einn hryðjuverkamannanna var skotinn til bana.