Árásin hófst um klukkan 20 við Schwedenplatz í miðborginni en þar nærri er meðal annars bænahús gyðinga. Karl Nehammer, innanríkisráðherra, staðfesti fljótlega að um hryðjuverkaárás væri að ræða.
Á tólfta tímanum sagði Nehmann í samtali við ÖRF-sjónvarpsstöðina að einn hryðjuverkamaður hafi verið skotinn til bana og leitað væri að einum til viðbótar hið minnsta. Hann sagði viðkomandi vera þungvopnaðan.
Lögreglan hefur lokað miðborginni af en takmarkar ekki leit sína við miðborgina. Sérstakar sveitir lögreglumanna hafa verið settar saman til að annast leitina að þeim sem ganga lausir og takmarkast leitin ekki við Vín að sögn Nehammer. Eftirlit hefur verið hert á landamærum landsins og herinn hefur verið kallaður til aðstoðar og sér nú um gæslu við erlend sendiráð og aðrar byggingar í borginni.
Fólk er beðið um að halda sig frá miðborginni og börn þurfa ekki að mæta í skóla í dag.
Sebastian Kurz, kanslari, sagði í færslu á Twitter að um „viðbjóðslegt hryðjuverk“ væri að ræða.
14 eru særðir, þar af margir alvarlega. Einn þeirra er lögreglumaður sem var á vakt við bænahús gyðinga. Hryðjuverkamaðurinn sem lögreglan skaut er sagður hafa verið með sprengjuvesti.
Lögreglan segir að skotárásir hafi verið gerðar á sex stöðum í miðborginni, allir eru þeir nærri bænahúsi gyðinga. Gærdagurinn var síðasti dagurinn áður en hertar sóttvarnaráðstafanir taka gildi í Austurríki og voru margir á veitingahúsum í miðborginni að njóta síðustu máltíðanna á veitingahúsum að sinni.
