Donald Trump, Bandaríkjaforseti, er snúinn aftur til starfa í Hvíta húsinu eftir innlögn á Walter Reed hersjúkrahúsið fyrir helgi eftir að hann greindist með COVID-19. Trump birti myndband í gær af sér sem á að sýna að hann sé mættur aftur til starfa á nýjan leik. Í myndbandinu segir hann að smitið hafi verið „blessun frá guði“ því hann hafi lært um hugsanleg lyf gegn sjúkdómnum.

CNN segir að Trump virðist vera glaður en hann hafi virst andstuttur á köflum og hafi virst vera með andlitsfarða. Einnig virðist sem myndbandið hafi verið klippt til.

„Ég held að það hafi verið blessun frá guði að ég smitaðist. Þetta var blessun í dulargervi,“

sagði hann um COVID-19 og eigin reynslu af tilraunum með lyf gegn veirunni á meðan hann dvaldi á sjúkrahúsinu. Hann nefndi sérstaklega stóran skammt af mótefnablöndu frá Regeneron sem hann sagðist hafa beðið lækna um að gefa sér. Þetta hafi átt sinn þátt í bata hans. Hann sagði lyfið „lækningu“ og að hann muni gera það aðgengilegt fyrir alla Bandaríkjamenn, þeim að kostnaðarlausu.

„Ég vil að allir fái sömu meðferð og forsetinn ykkar. Þetta var ótrúlegt.“