Grunur lögreglunnar fór að beinast að honum og að hann hefði komið að hvarfi mæðgnanna á einn eða annan hátt. Hann gekkst undir lygamælispróf og niðurstaða þess varð til að styrkja grunsemdir lögreglunnar enn frekar í garð þessa 33 ára manns. Chris átti hjákonu en í hans huga kom ekki til greina að skilja við Shannan.
Í fyrstu hélt hann því fram að Shannan hefði myrt dætur þeirra hjóna. Lögreglan trúði þessu ekki og að lokum játaði hann að hafa myrt dætur sínar og eiginkonu.
Þetta kemur meðal annars fram í heimildarmyndinni „American Murder: The family next door“ sem var nýlega tekin til sýninga hjá Netflix. Myndin er byggð á upptökum úr einkasafni fjölskyldunnar síðustu vikurnar og dagana fyrir morðin auk upptaka frá lögreglumönnunum sem rannsökuðu málið.
Eitt og annað nýtt kemur fram í heimildarmyndinni. Til dæmis að grunur lögreglunnar um aðild Chris að hvarfinu hafi vaknað sama dag og mæðgurnar hurfu. Það gerðist eftir að nágranni fjölskyldunnar sagði lögreglunni að Chris hegðaði sér ekki eðlilega.
„Hann vaggar sé aldrei svona. Hann er ekki vanur að færa hluti fram og til baka í bílskúrnum,“
sagði nágranninn og sýndi lögreglunni upptöku úr eftirlitsmyndavél frá morðnóttinni. Hann reyndist hafa rétt fyrir sér.
Eftir að hann hafði kyrkt Shannan pakkaði Chris líkinu inn í teppi og setti í aftursæti bíls þeirra. Því næst sótti hann dæturnar og fór með þær og lík Shannan til Andarko Petroleum sem er eitt stærsta olíu- og gasvinnslufyrirtækið í Colorado.
„Ég sé alla bílferðina þangað fyrir mér. Gat ég bjargað dætrum mínum? Hefði ég getað gert eitthvað? Af hverju gerði ég þetta, það veit ég ekki. Það eina sem ég vildi í lífinu var að verða faðir og fá þær til að elska mig,“
sagði Chris í yfirheyrslu hjá lögreglunni.
Fjórum dögum eftir að mæðgurnar hurfu fundust lík þeirra í olíutanki fullum af hráolíu.
Þegar réttarhöldin stóðu yfir í nóvember 2018 voru krufningarskýrslur lagðar fram. Þá kom fram að Chris hafði kyrkt mæðgurnar.
Hann var dæmdur í þrefalt lífstíðarfangelsi án möguleika á reynslulausn. CNN skýrir frá.
