Aðventuljós, eins og sjást á myndinni sem fylgir þessari frétt, hafa vakið töluverða athygli og umræðu í Svíþjóð að undanförnu. Mörgum þykja þessi ljós eiginlega frekar ósmekkleg, aðrir sjá húmor í þessu og enn aðrir vita eiginlega ekki hvaða skoðun þeir eiga að hafa á þessu.

Það er staðsetning ljósanna á persónunum sem margir misskilja og kannski ekki furða þegar ljósin eru skoðuð. Þau eiga að tákna hendur sem biðja en á samfélagsmiðlum eru mörg þúsund manns annarrar skoðunar. Aftonbladet skýrir frá þessu.

„Mér datt fyrst í hug að þetta liti út eins og lítil barnaníðingsvagga og að allir standi með standpínu fyrir framan Jesú. Mér brá við þetta, þetta er hræðilegt,“

hefur Aftonbladet eftir Maria frá Kalmar. Hún sagði jafnframt að hún geti ímyndað sér að hönnuðurinn hafi ætlað að búa til fín aðventuljós en árangurinn hafi ekki verið sem skyldi, hrein mistök.

Það er fyrirtækið Star Trading sem selur aðventuljósin. Í samtali við Sænska ríkisútvarpið sagði talsmaður fyrirtækisins að þau væru búin til fyrir gott málefni og að ef fólk sjái eitthvað annað sé það með undarlegt hugmyndaflug.

Margir hafa tjáð sig um ljósin á Facebook og Twitter:

„Aðventuljós ársins?“

„Undarlegt að vera svona mikið með kynlíf á heilanum. Ég sé bara falleg aðventuljós.“