Margir hafa lent í að lögreglan stöðvi akstur þeirra af einhverri ástæðu og fæstir gleðjast yfir því. Aðrir hafa ekið fram hjá lögreglunni og verið með öndina í hálsinum af ótta við að verða stöðvaðir. En það er kannski ekki svo algengt að fólk stöðvi sjálfviljugt hjá lögreglunni þegar hún er við umferðareftirlit. Það gerði norskur maður þó á dögunum þegar lögreglan var við umferðareftirlit í Sotra.

Hann stöðvaði til að spyrja lögreglumennina til vegar. Þar sem hann hafði nú stöðvað ákváðu lögreglumenn að fá að sjá ökuskírteinið hans. Hann framvísaði þá þýsku skírteini sem var ekki í gildi. Því næst dró hann upp gamalt norskt ökuskírteini sem var útrunnið.

Bergens Tidende segir að lögreglumennirnir hafi því orðið að meina manninum að aka lengra. Ökumaðurinn sjálfur hafði að sögn á orði að hann hefði betur sleppt því að stöðva til að spyrja til vegar.