Þrettán ungmenni voru flutt á sjúkrahús í Lundúnum í gær eftir að þau átu sælgæti sem er talið hafa innihaldið THC sem er virka efnið í kannabis. Ungmennin héldu að þetta væri venjulegt sælgæti og höfðu enga hugmynd um að búið var að setja THC í það.

Sky News skýrir frá þessu. Fram kemur að sjúkrabílar hafi verið sendir að La Sainte Union Catholic skólanum í Highgate í norðurhluta Lundúna skömmu fyrir hádegi. Ungmennin fengu aðhlynningu á vettvangi og voru síðan flutt á sjúkrahús til öryggis að sögn lögreglunnar. Ekki er talið að þau hafi orðið fyrir alvarlegri eitrun.

Lögreglan er að rannsaka málið en enginn hefur verið handtekinn vegna þess enn sem komið er.