Í viðtali við Der Spiegel í gær sagði Navalny að „Pútín stæði á bak við glæpinn“. Navalny veiktist heiftarlega af völdum Novichock taugaeitursins sem hann komst í snertingu við. Almennt er talið að útsendarar rússnesku leyniþjónustunnar hafi komið eitrinu fyrir á drykkjaríláti sem Navalny drakk síðan úr. Þetta sama eitur notaði rússneska leyniþjónustan þegar hún reyndi að ráða Sergei Skripal af dögum í Englandi 2018.
„Ég hef engar aðrar skýringar á þessum glæp. Ég er ekki að segja þetta til að gleðja sjálfan mig heldur á grunni staðreynda,“
Sagði Navalny.
Hann veiktist þegar hann var um borð í flugvél á leið frá Síberíu til Moskvu þann 20. ágúst. Flugstjórinn lenti strax á næsta flugvelli, í Omsk, þar sem Navalny var lagður inn á sjúkrahús en hann var meðvitundarlaus við komuna þangað. Tveimur dögum síðar var hann fluttur á sjúkrahús í Berlín.
Samstarfsfólk hans hefur lengi haldið því fram að ráðamenn í Moskvu hafi staðið á bak við morðtilræðið en þetta er í fyrsta sinn sem Navalny segir það sjálfur. Talsmaður ríkisstjórnarinnar vísaði ásökununum á bug í gær og sagði þær ekki eiga sér neina stoð í raunveruleikanum.
Navalny hefur margoft verið handtekinn og áreittur af yfirvöldum. Honum var meinað að bjóða sig fram til forseta 2018 en Pútín virðist vera nokkuð smeykur við hann. Andstæðingar Pútíns hafa margir hverjir látist af undarlegum orsökum og banatilræðið við Navalny er bara það síðasta í röð árása á andstæðinga Pútíns.
Navalny sagði í samtali við Der Spiegel að hann hafi í hyggju að snúa aftur til Rússlands um leið og heilsa hans leyfi, jafnvel þótt það geti reynst honum hættuleg.
„Verkefni mitt núna er að vera maðurinn sem er ekki hræddur og ég er ekki hræddur!“
