17 ára stúlka var lamin af foreldrum sínum og sítt hár hennar rakað af fyrir að „elska kristinn pilt“. Þetta átti sér stað í Besancon í Frakklandi. Foreldrar hennar eru múslimar og tóku því vægast sagt illa að stúlkan hefði fellt hug til pilts sem er kristinnar trúar.

Mirror segir að stúlkan sé af bosnískum ættum. Það var á mánudag í síðustu viku sem foreldrar hennar og frændi beittu hana ofbeldi og rökuðu hárið af henni. Hún rifbeinsbrotnaði og marðist töluvert að sögn yfirvalda.

Franskir saksóknarar segja að foreldrar stúlkunnar og frændi verði dregin fyrir dóm og ákærð fyrir ofbeldi gagnvart barni.

Gerald Darmanin, innanríkisráðherra, tjáði sig um málið á Twitter og sagði:

„Rökuð og lamin af því að hún elskaði kristinn pilt. Illa brugðið vegna þessarar meðferðar á 17 ára stúlku. Þessi villimennska kallar á þyngstu refsingu.“

Unga parið bjó í sama húsi og stóð ástarsamband þeirra yfir í nokkra mánuði og þekktust fjölskyldur þeirra. Engin vandamál voru uppi fyrr en unga parið fór að ræða um að ganga í hjónaband. Foreldrar stúlkunnar brugðust illa við því og sögðu að hún væri múslimi og að múslimar giftist ekki kristnu fólki.

Stúlkunni hefur nú verið komið fyrir á öruggum stað og nýtur hún verndar yfirvalda. Foreldrar hennar og ættingjar fá ekki að vita hvar hún er.