Á sunnudaginn þaut loftsteinn, sem nefnist 2020 QG, fram hjá jörðinni í aðeins 2.950 km hæð yfir Indlandshafi. Aldrei fyrr, svo vitað sé, hefur loftsteinn farið svo nærri jörðinni án þess að rekast á hana eða koma inn í gufuhvolfið. Loftsteinninn er á stærð við bíl. Talsmenn bandarísku geimferðastofnunarinnar NASA viðurkenna að þar á bæ hafi fólk ekki séð loftsteinninn fyrr en hann var farinn hjá.

Sky skýrir frá þessu. Fram kemur að ef braut loftsteinsins hefði skorist við braut jarðarinnar hefði hann líklega brunnið upp í gufuhvolfinu.

Mörg hundruð milljónir lítilla loftsteina eru á sveimi í sólkerfinu okkar en það er mjög erfitt að koma auga á þá áður en þeir koma mjög nærri jörðinni.

Talsmaður NASA sagði í samtali við Business Insider að loftsteinninn hafi komið að jörðinni úr sólarátt og enginn hafi tekið eftir honum.

Upp komst um ferðir hans vegna myndar sem voru teknar með breiðlinsumyndavél í Zwicky Transient rannsóknarstöðinni í Kaliforníu. Þar er sjálfvirkur stjörnusjónauki sem skannar himininn í leit að hlutum á borð við loftsteina og halastjörnur.

Myndin var tekin sex klukkustundum eftir að loftsteinninn fór næst jörðinni. Hann er þrír til sex metrar í þvermál og hraði hans er um 44.400 km/klst.