Nýja-Sjáland er orðinn einn heitasti staðurinn fyrir Breta og Bandaríkjamenn sem leita að nýjum heimkynnum víðs fjarri erfiðleikunum á heimaslóðum. En eitt vandamál steðjar að þeim og draumum þeirra: Eins og staðan er núna eru þeir ekki velkomnir á Nýja-Sjálandi.
Ein af aðferðunum sem ríkisstjórn Jacinda Ardern hefur beitt til að halda kórónuveirunni í skefjum er að loka landinu. Útlendingar fá ekki að koma þangað þessar vikurnar, aðeins fólk með nýsjálensk vegabréf fær að koma inn í landið.
Í rúmlega þrjá mánuði hefur ekki eitt einasta innanlandssmit komið upp. 24 eru í sóttkví eins og stendur en fólkið var allt að koma frá útlöndum þegar það greindist með veiruna skæðu.
Yfirvöld segja að strax í apríl hafi þau orðið vör við aukinn áhuga fólks á að flytja til landsins en þá byrjuðu fjölmiðlar að flytja fréttir af hörðum og áhrifaríkum aðgerðum yfirvalda til að hindra útbreiðslu kórónuveirunnar.
Síðan þá hefur áhugi Bandaríkjamanna á að flytja til landsins aukist um 160% og Breta um 40% ef miða má við heimsóknir á opinberar vefsíður sem veita upplýsingar um flutninga til landsins. Nýja-Sjáland tekur almennt við innflytjendum og stundum hefur verið auglýst eftir innflytjendum til að uppfylla ákveðnar þarfir atvinnulífsins.
En fólk verður að láta sér nægja að dreyma þessa dagana eða þar til að landamærin verða opnuð á nýjan leik, þá verður væntanlega hægt að byrja að taka við innflytjendum á nýjan leik.
