Hryðjuverkaógnin, sem steðjar að Bandaríkjunum, er miklu meiri frá öfgahægrimönnum en íslömskum öfgamönnum. Þetta kemur fram í nýrri skýrslu Center for Strategic and International Studies (CSIS) sem hefur rannsakað öll hryðjuverk í Bandaríkjunum undanfarinn aldarfjórðung.

Flestar hryðjuverkaárásir og fyrirætlanir í Bandaríkjunum koma frá öfgahægrimönnum og þetta hefur færst í aukana á síðustu árum segja skýrsluhöfundar.

„Hryðjuverk öfgahægrimanna hafa í miklum mæli skotið öðrum hópum ref fyrir rass.“

Segir meðal annars í skýrslunni sem er byggð á rannsóknum á 893 hryðjuverkum eða hryðjuverkaáætlunum. Á síðasta ári stóðu öfgahægrimenn á bak við tvo þriðju hluta allra hryðjuverka og fyrirætlanir um slíkt í Bandaríkjunum. Það sem af er ári er hlutfallið 90 prósent.