Að minnsta kosti þrisvar sinnum hefur danska lögreglan rannsakað hvort Peter Madsen tengist morðinu á Emilie Meng sem var myrt í júlí 2016. Hún var 17 ára. Hún hvarf þegar hún var á leið heim eftir næturskemmtun. Lík hennar fannst síðan í desember sama ár fjarri þeim stað þar sem hún sást síðast. Peter Madsen myrti sænsku fréttakonuna Kim Wall um borð í kafbáti sínum Nautilius í ágúst 2017.

Í gær kom bókin „Emilie Meng – Pigen der forsvandt“ út í Danmörku en tveir blaðamenn B.T. skrifuðu hana. Í bókinni fara þeir yfir málið og varpa ljósi á suma þeirra sem lágu undir grun í málinu. Í umfjöllun B.T. kemur fram að lögreglan hafi að minnsta kosti þrisvar rannsakað hvort Madsen tengist morðinu á Meng.

Sjónir lögreglunnar eru sagðar hafa beinst að ákveðnum líkindum í málunum. Líkum beggja kvennanna var komið fyrir í vatni þegar þær höfðu verið myrtar. Madsen er einnig sagður hafa haft aðgang að hvítum sendibíl sem passar við þá lýsingu sem lögreglan gaf á bíl sem gæti tengst málinu. Sendibíllinn var margoft nefndur til sögunnar við réttahöldin yfir Madsen vegna morðsins á Kim Wall.

Enginn dómur er kveðinn upp í bókinni og Madsen ekki sagður sekur um morðið á Meng en einfaldlega skýrt frá því að hann hafi verið til rannsóknar vegna hugsanlegra tengsla við málið.