Aðfaranótt miðvikudags í síðustu viku var lögreglunni í Dumon í New Jersey tilkynnt um lítið barn sem væri eitt á göngu við fjölbýlishúsahverfi. Lögreglumenn voru fljótir á vettvang og fundu þar fimm ára gamlan dreng einan á ferð.

ABC News skýrir frá þessu. Lögreglumenn fundu síðan íbúðina, sem drengurinn bjó í, en þar inni var 36 ára móðir hans, Michelle Burns og var hún látin er að var komið. Áður höfðu þeir fengið þær upplýsingar hjá frænku drengsins að Michelle svaraði ekki í síma.

Michelle hafði verið stunginn í hnakkann með eldhúshníf að sögn lögreglunnar. Engin ummerki voru um að hún hefði veitt banamanni sínum viðnám.

Frænka Michelle sagði lögreglunni að hún hefði heyrt hávaða berast frá íbúðinni fyrr um kvöldið en þar bjó Michelle ásamt börnum sínum og 36 ára unnusta.

Skömmu eftir að lögreglan fann lík Michelle hafði lögreglan í Closter í New Jersey samband en lögreglumenn höfðu þá handtekið unnustann. Hann var með tvö börn Michelle með sér þegar hann var handtekinn, þau eru sex ára og 18 mánaða. Unnustinn er grunaður um morð, að vera með ólöglegt vopn og að hafa stefnt velferð barna í hættu.