Franski bílaframleiðandinn Renault er í miklum vanda vegna heimsfaraldurs kórónuveiru og þarf á aðstoð að halda frá franska ríkinu til að komast í gegnum hremmingarnar. Þetta sagði Bruno Le Maire, fjármálaráðherra Frakklands, á föstudaginn.

Í samtali við Europe 1 radio sagði hann að fyrirtækið eigi í „alvarlegum fjárhagsörðugleikum“ og að „Renault gæti horfið“.

Síðasta ár var fyrirtækinu erfitt og var rekstrarniðurstaðan sú versta í áratug. Heimsfaraldurinn hefur síðan aukið á vandræðin.

Bílasala hefur dregist gríðarlega saman og mikil truflun hefur orðið á starfsemi bílaverksmiðja en þeim þurfti að loka til að hemja útbreiðslu veirunnar. Renault lokaði 12 verksmiðjum í Frakklandi um miðjan mars en er að opna þær aftur þessa dagana.