Í mörgum ríkjum Bandaríkjanna er nú byrjað að létta á þeim hömlum sem voru settar vegna heimsfaraldurs kórónuveiru. Í heildina fer smittilfellum fækkandi í landinu, sérstaklega vegna þess að faraldurinn virðist standa í stað í New York þar sem hann var verstur.

Þriðjungur staðfestra smittilfella í landinu hefur verið í New York og nágrannaríkjunum New Jersey og Connecticut. Þar hefur einnig helmingur allra dauðsfalla af völdum veirunnar í landinu verið skráður.

New York Times segir að nú sé veiran farin að dreifa meira úr sér í strjálbýlli ríkjum og þar fer smitum fjölgandi. Nú eru lítil og fámenn samfélög farin að rata í fréttirnar vegna smittilfella. Má þar nefna Trousdale í Tennessee, Dakota í Nebraska og Lincoln í Arkansas. Þetta eru þau svæði þar sem flest smit hafa nú greinst miðað við höfðatölu.

Á þessum svæðum hafa smit brotist út á svæðum þar sem lítið sem ekkert var um smit þar til nýlega. En þar sem smit hefur borist inn í eitt fyrirtæki eða stofnun hefur smitið átt auðvelt með að dreifast út. Þetta á til dæmis við um elliheimili, geðsjúkrahús, fangelsi, stór sláturhús og kjötvinnslur.