Heimsfaraldur kórónuveiru hefur ekki bara áhrif á okkur mannfólkið því ýmsar dýrategundir finna einnig fyrir áhrifum hans. Víða eru það jákvæð áhrif fyrir dýrin sem losna nú við ágang manna og geta verið í friði. En fyrir bandaríska rottur er heimsfaraldurinn ekkert gleðiefni.

Bandaríska smitsjúkdómastofnunin hefur sent frá sér aðvörun til almennings og hvetur fólk til að varast svangar og árásargjarnar rottur. Ástæðan er að veitingastaðir hafa verið lokaðir um hríð og því hafa rotturnar minna að éta en venjulega. Þetta gerir þær árásargjarnar.

Þær geta yfirleitt gætt sér á afgöngum úr yfirfullum ruslatunnum veitingastaða en síðustu átta vikur hafa verið þeim erfiðar.

Smitsjúkdómastofnunin ráðleggur fólki að tryggja að hús séu vel lokuð, að rusl sé fjarlægt og geymt í öruggum ruslatunnum og að sleppa því að gefa fuglum og gæludýrum að éta í görðum.

Rottur, sem hika ekki við að leggja sér aðrar rottur til munns þegar hart er í ári, eru óvenjulega árásargjarnar þessa dagana segir smitsjúkdómastofnunin. Í apríl sáust dæmi um að þær ætu afkvæmi sín.

The New York Times segir að stórir hópar af rottum hafi safnast sama á götum New Orleans en í Chicago eru þær sagðar fara langar leiðir í leit að æti og séu nú einnig á ferð að degi til.