Sænska aðferðafræðin í baráttunni við COVID-19 virðist, að minnsta kosti ennþá, halda efnahagslífi landsins gangandi. Á sama tíma og flest Evrópuríki hafa lokað samfélögunum meira og minna hafa Svíar farið allt aðra leið og ekki sett miklar hömlur á daglegt líf fólkst. Það virðist hafa góð áhrif á efnahagslífið ef miða má við spá frá sænsku hagstofunni sem var birt á þriðjudaginn.

Í fyrstu þremur mánuðum ársins var hagvöxturinn, samkvæmt spánni, neikvæður um 0,3 prósent sem er miklu minni samdráttur en annarsstaðar í Evrópu. Til dæmis var hagvöxtur á Evrusvæðinu neikvæður um 3,8 prósent á fyrsta ársfjórðungi.

Það eru þó blikur á lofti því atvinnuleysi hefur aukist mikið en frá því um miðjan mars hefur atvinnulausum fjölgað um 110.000. Um 300.000 manns hafa verið sendir tímabundið heim úr vinnu.