Ef þú ert meðal þeirra sem sitja og vorkenna sjálfum sér svolítið vegna COVID-19 faraldursins og þeirrar félagslegu einangrunar sem því fylgir þá er kannski upplyftandi að hugsa til Brent Underwood sem er kannski sá maður sem er í mestri einangrun þessa dagana.

Brent er ekki í einangrun í bæ eða borg því hann er í gamla námubænum Cerro Gordo sem hann keypti fyrir sem svarar til um 200 milljóna íslenskra króna fyrir tveimur árum. Bærinn er í fjöllunum í Kaliforníu, um þriggja og hálfrar klukkustunda akstur frá Los Angeles við eðlileg akstursskilyrði. Sky skýrir frá þessu.

En aðstæðurnar hafa ekki verið eðlilegar að undanförnu. Það eru um 40 kílómetrar í næstu verslun en Brent hefur ekki komist þangað vegna mikilla snjóa. Hann er algjörlega innilokaður í þessum yfirgefna námubæ. Brent er því góð fyrirmynd fyrir aðra um hvernig á að halda góðri fjarlægð frá öðru fólki!

Hann kom til bæjarins fyrir rúmum mánuði og þá var veðrið fínt en skyndilega fór að snjóa og það ekkert smá. Brent kemst því ekkert á bílnum sínum.

Hann hefur þó nóg að bíta og brenna því hann hefur einfaldlega brætt snjó til að hafa drykkjarvatn og hann er með mikið af geymsluþolnum mat með sér. En það sem hann hefur mestar áhyggjur af eru reimleikar í bænum.

„Ég hef heyrt undarleg hljóð og bók datt úr hillunni um daginn án þess að nokkur eðlileg skýring væri á því.“

Sagði Brent sem finnst honum þó ekki ógnað af illum öndum.