Karlmaður, frá Phoenix í Arizona í Bandaríkjunum, lést og eiginkona hans er í lífshættu eftir að þau tóku klórókínfosfat í viðleitni til að sleppa við smit af völdum COVID-19 veirunnar. Svo virðist sem þau hafi ekki tekið þá útgáfu klórókínfosfats sem fæst í lyfjaverslunum heldur „blöndu sem er oft notuð til að þrífa fiskabúr“.

Þetta kemur fram í yfirlýsingu heilbrigðisyfirvalda að sögn CNN. NBC News ræddi við konuna sem sagði að þau hjónin hafi heyrt um tengsl klórókíns við kórónuveiruna á fréttamannafundi Donald Trump forseta. Þau hafi ákveðið að taka efnið þar sem þau „óttuðust að smitast“.

Hún sagðist hafa átt efnið heima því það hafi hún notað til að þrífa fiskabúr.

„Ég sá þetta í hillunni og hugsaði með mér: „Er þetta ekki efnið sem var verið að tala um í sjónvarpinu?“

Trump hefur nefnt klórókín sem hugsanlega lækningu við COVID-19 en efnið er notað gegn malaríu og fleiri sjúkdómum en heilbrigðisyfirvöld hafa ekki samþykkt notkun þess gegn COVID-19.