Niðurstöður nýrrar umfangsmikillar rannsóknar sýna að líkamshiti okkar mannanna hefur lækkað og er eðlilegur líkamshiti ekki lengur 37 gráður. Niðurstaðan er að eðlilegur líkamshiti sé nú um 36,4 gráður svo hann hefur lækkað töluvert síðan 37 gráðu viðmiðið var sett árið 1851. Það var byggt á mörgum milljónum hitamælinga sem voru gerðar á fólki í Leipzig í Þýskalandi.

Það eru bandarískir vísindamenn sem standa á bak við nýju rannsóknina en niðurstöður hennar hafa verið birtar í eLife. Þeir fóru yfir gríðarlegt magn gagna sem var safnað á síðustu 157 árum. Allt frá rannsóknum á uppgjafarhermönnum úr bandarísku borgarastyrjöldinni til 230.000 mælinga sem voru gerðar á árunum 2007 til 2017. Í allt byggir rannsóknin á upplýsingum um líkamshita 189.000 manns.

Vísindamennirnir eru vissir í sinni sök um niðurstöðurnar og segjast hafa slegið því föstu að hjá báðum kynjum hafi líkamshitinn lækkað um 0,03 gráður á hverjum áratug síðan 1851.

Aldursmunurinn á þátttakendum í rannsókninni er 197 ár. Það veldur því að þrátt fyrir að hitinn hafi bara lækkað örlítið á hverjum áratug verður lækkunin töluverð þegar svo langur tími er til rannsóknar. Tekið var tilliti til þyngdar, hæða og aldurs þátttakenda og í sumum rannsóknum var tími dags, þegar fólkið var mælt, einnig tekin með í útreikningana.

Vísindamennirnir segja að þessi umtalsverða og yfirstandandi breyting á líkamshita fólks myndi grunn að skilningi á lýðheilsu og lífslengd. Þeir komast ekki að neinni skýrri niðurstöðu um af hverju þessi breyting hefur átt sér stað. Þeir velta þó upp hugmyndum um að betri tannheilsa, aukið hreinlæti, færri tilfelli berkla og sýfilis, sýklalyf og margt annað gæti hafa valdið því að krónískum sýkingum hefur fækkað.

Þegar 37 gráðu viðmiðið var sett árið 1851 lifði fólk mun styttra en það gerir í dag og glímdi oft við ýmsar sýkingar. Þær gætu hafa haft áhrif á niðurstöðuna um hver eðlilegur líkamshiti væri.