Þrátt fyrir að Grænlendingar og Danir hafi verið fljótir að vísa tilboði Donald Trump, Bandaríkjaforseta, um kaup Bandaríkjanna á Grænlandi á bug hafa Bandaríkjamenn greinilega enn áhuga á Grænlandi. Í gær fundaði John Bolton, þjóðaröryggisráðgjafi Trump, með bandaríska sendiherranum í Danmörku og ræddu þau meðal annars hvernig Bandaríkin geti styrkt efnahagslegt samband sitt við Grænland.

The Hill skýrir frá þessu. En viðræðurnar snerust einnig um málefni Norðurslóða, viðskipti og um að auka og bæta tengslin við Danmörku, Grænland og Færeyjar. Það er því ljóst að áhugi Bandaríkjamanna á þessum heimshluta er mjög mikil um þessar mundir og var heimsókn Mike Pence, varaforseta Bandaríkjanna, hingað til lands einmitt merki um það.

Great discussion with @USAmbDenmark on deepening ties with Denmark, Greenland, and the Faroe Islands. Topics included Arctic and energy security, trade, and boosting US economic ties with Greenland, including investments in mineral exploration projects and airport upgrades. pic.twitter.com/L5T1d9IrXr

— John Bolton (@AmbJohnBolton) September 5, 2019

Bolton skýrði frá fundinum með sendiherranum, Carla Sands, í tísti á Twitter. Þar segir að viðræður þeirra hafi snúist um Norðurslóðir og orkuöryggi, viðskipti og að setja aukinn hraða í efnahagslegt samband Bandaríkjanna við Grænland, þar á meðal fjárfestingar í verkefnum tengdum námuvinnslu og endurbótum á flugvöllum. Þetta eru einmitt verkefni sem Kínverjar hafa verið að reyna að láta að sér kveða í á Grænlandi á undanförnum misserum auk fleiri verkefna.