Hundar geta verið tryggir og traustir fylgdarsveinar eigenda sinna og það að eiga hund getur haft jákvæð áhrif á andlega og líkamlega vellíðan fólks og dregið úr stressi og þunglyndi. Af þessum sökum er víða farið að nota hunda í tengslum við umönnun aldraðra og víðar innan heilbrigðiskerfisins.

Niðurstöður nýrrar rannsóknar vísindamanna sýna að hundaeigendur hreyfðu sig meira en aðrir og borðuðu að jafnaði hollari mat. Þetta hafði jákvæð áhrif á blóðþrýsting, blóðfitu og neysluvenjur þeirra. 1.800 manns tóku þátt í rannsókninni.

„Að eiga hund eykur vellíðan fólks, dregur úr einmanaleika og dregur úr líkunum á þunglyndi. Allt þetta tengist síðan óbeint hjarta- og æðaheilbrigði.“

Segir Francisco Lopez-Jimenez sem stýrði rannsókninni sem var gerð á vegum The Mayo Foundation for Medical Education and Research. Niðurstöðurnar eru í takt við niðurstöður annarra svipaðra rannsókna.