En hvað sem öllum samsæriskenningum líður þá er ekkert vitað um örlög Emanuela. Hún var á leið heim úr tónlistarkennslu þegar hún hvarf í júní 1983.
Nýlega fékk fjölskylda hennar dularfulla ábendingu í bréfi um að Emanuela sé grafin í grafhvelfingu í Páfagarði. Grafhvelfingin nefnist Teutonic og er ætluð fólki frá Þýskalandi, Austurríki, Hollandi og flæmska hluta Belgíu.
Fyrir ofan hvelfinguna er stytta af engli sem bendir til jarðar. Í bréfinu stendur:
„Sjáðu hvert engillinn bendir.“
Í framhaldi af þessu hefur Orlandi-fjölskyldan beðið Páfagarð um að fara yfir allar skýrslur um grafhvelfinguna og opna hana til að kanna hvort líkamsleifar Emanuela séu þar inni.
The Telegraph segir að samkvæmt umfjöllun ítalska dagblaðsins Corriere della Sera hafi komið í ljós að grafhvelfingin hafi veirð opnuð að minnsta kosti einu sinni frá því að henni var lokað fyrir margt löngu. Á henni er áletrun til heiðurs þýska prinsinum Gustavo von Hohenlohe sem var gerður að erkibiskupi 1857.
Laura Sgró, lögmaður Orlandi-fjölskyldunnar, segir í bréfi til Páfagarðs að einhverjir hafi vitað að hugsanlega væri lík Emanuela verið falið í grafhvelfingunni. Hún segir að einhver hafi árum saman komið reglulega að hvelfingunni og skilið blóm eftir þar.
Talsmaður Páfagarðs hefur staðfest að bréf frá Sgró hafi borist og verið sé að íhuga hvernig bregðast eigi við því.
Frans páfi tilkynnti nýlega að hann ætli að opna skjalageymslu Páfagarðs með gögnum sem tengjast valdatíð Píusar XII en hann hefur verið sakaður um að hafa ekki mótmælt ofsóknum nasista gegn gyðingum né Helförinni.
Faðir Emanuela var starfsmaður Páfagarðs og bjó fjölskyldan í Páfagarði sem er minnsta sjálfstæða ríki heims. Emanuela var einnig ríkisborgari í Páfagarði.
