Loftslagsbreytingarnar og mengun valda því að lífsskilyrðin í hafinu fara versnandi og valda sérstaklega stærri fiskategundum vanda. Núna eru 700 hafsvæði þar sem súrefnismagnið er mjög lágt en það eru slæmar fréttir fyrir tegundir á borð við túnfisk, hákarla og sverðfiska.

BBC skýrir frá þessu og byggir á nýrri umfangsmikilli skýrslu frá World Conservation Union (IUCN) sem eru óháð alþjóðleg samtök sem hafa að markmiði að vinna að varðveislu og sjálfbærri nýtingu náttúruauðlinda.

Í skýrslunni kemur fram að á sjöunda áratugnum hafi um 45 hafsvæði glímt við lítið súrefnismagn en nú hafi ástandið versnað enn frekar.

Vísindamenn hafa lengi vitað að mengun, sérstaklega vatn sem inniheldur köfnunarefni og fosfór, á þátt í að minnka súrefnismagnið í höfunum. Samhliða hækkandi meðalhita hitna höfin og þar með dregur úr getu þeirra til að innihalda súrefni.

Í skýrslunni kemur fram að heimshöfin muni að meðaltali missa þrjú til fjögur prósent af súrefni sínu fram að næstu aldamótum miðað við óbreytta framvindu mála. Þetta mun hafa alvarlegar afleiðingar fyrir tegundir sem lifa á 0 til 1.000 metra dýpi en þar er mesti fjölbreytileiki lífs í höfunum.