Í nýrri skýrslu frá TrygFonden í Danmörku er varað við hættunni sem samfélaginu stafar af öfgahægrimönnum. Sífellt fjölgar í þeim hópi og telja skýrsluhöfundar líklegt að það geti blásið krafti í fólk sem er tilbúið til ofbeldisverka.

Skýrslan var unnin af öryggisfyrirtækinu Certa Intelligence & Security fyrir TrygFonden. Í henni segir að boðskapur og umfang samtaka öfgahægrimanna fari vaxandi og það verði að taka þetta alvarlega. Fram kemur að þessa stundina séu ekki starfandi hópar sem sérstaklega mikil ógn stafi af en umfang starfsemi öfgahægrimanna fari sífellt vaxandi.

Skýrslan er byggð á viðtölum við ýmis félagasamtök, starfsmenn félagsþjónustu, yfirvöld, lögregluna og fleiri sem sinna ýmsum verkefnum tengdum afbrotum og öfgahyggju.