Norski milljarðamæringurinn, nú fyrrverandi, Einar Aas tók mikla áhættu fyrir tveimur árum. Hann átti þá rúmlega tvo milljarða norskra króna en hann hafði auðgast á að stunda spákaupmennsku í tengslum við verðþróun á raforku. Óhætt er að segja að honum hafi gengið vel í því eins og hinn miklu auður gefur til kynna.

En fljótt skipast veður í lofti. Hann tapaði 400 milljörðum norskra króna 2017 á spákaupmennsku sinni og þá greip hann til þess ráðs að leggja aleiguna undir um að verðmunur á rafmagni í Þýskalandi og Skandinavíu myndi minnka 2019.

Á síðasta ári stóð auður hans í 1.642.860.442 norskum krónum samkvæmt skattframtali hans. Í nýútkomnu skattayfirliti norska skattsins er auður Einar skráður 0 krónur. TV2 skýrir frá þessu.

Einar segir sjálfur að hann hafi tapað aleigunni þann 13. september 2018 og hafi í kjölfarið neyðst til að lýsa sig gjaldþrota.

Hann hefði hugsanlega getað sloppið við gjaldþrot ef hann hefði haft annað fyrirkomulag á fjármálum sínum. Hann stundaði nefnilega spákaupmennskuna eins og um hans persónulegu fjármál væri að ræða í stað þess að vera með eignarhaldsfélag utan um hana. Ef eignarhaldsfélagið hefði orðið gjaldþrota hefði Einar sloppið við persónulegt gjaldþrot en það gerði hann sem sagt ekki.