58 ára dönsk kona ætlaði í sumarfrí með fjölskyldu sinni í byrjun júlí en hún hafði einmitt fengið sumarfrí á þessum tíma árin á undan og reiknaði með að fá aftur frí í byrjun júlí. En þegar vaktaplanið hennar var birt kom í ljós að hún átti að vinna þessa viku og því var ekki annað að sjá en fjölskyldan þyrfti að fara án hennar í frí.

Konan greip því til þess að tilkynna sig veika eftir að hafa margreynt að fá vaktaplaninu breytt. Hún sagðist þurfa að gangast undir skurðaðgerð í vikunni áður en hún ætlaði að vera í fríi og yrði því frá í þessar tvær vikur.

Hún var því í fríi þessar vikur en allt komst þetta upp þegar hún mætti aftur til vinnu og var hún kærð fyrir skjalafals og fjársvik.

Undirréttur í Hróarskeldu dæmdi konuna í 30 daga skilorðsbundið fangelsi fyrir þetta en hún viðurkenndi sök. Ekki fylgir sögunni hvort hún starfi enn á sama staðnum.