Dómari í San Francisco kvað á föstudaginn upp dóm um að Tesla og forstjóri fyrirtækisins, Elon Musk, hefðu brotið bandaríska vinnulöggjöf með því að beita sér gegn starfi verkalýðsfélaga. Musk var meðal annars sagður hafa beitt sér gegn því að starfsfólk Tesla væri í stéttarfélögum.

The Washington Post skýrir frá þessu. Fram kemur að meðal þeirra gagna sem voru lögð fyrir dóm hafi verið Twitterfærsla Musk frá 2018. Þá skrifaði hann að ekkert hindraði starfsfólkið í að skrá sig í stéttarfélög en að þær aðstæður og kjör sem boðið væri upp á hjá fyrirtækinu væru nú þegar betri en stéttarfélög gætu tryggt.

Í færslunni spurði hann af hverju starfsfólkið ætti að vera að greiða gjald til stéttarfélagsins og fórna möguleikum sínum á að eignast hlutabréf í fyrirtækinu. Hann benti einnig á að öryggismál væru tvisvar sinnum betri en þegar starfsfólkið var í samtökum verkamanna í bílaiðnaði og auk þess fengju allir starfsmenn framlög til sjúkratrygginga.

Tesla var einnig sakfellt fyrir að hafa refsað starfsfólki ef það reyndi að mynda stéttarfélag. Fyrirtækinu er gert að bjóða brottreknum starfsmanni starf á nýjan leik. Reiknað er með að Tesla áfrýi dómnum.