Hótanir eða ofbeldi munu hafa „umtalsverðar afleiðingar“ í för með sér segir John Bolton, þjóðaröryggisráðgjafi Donald Trump í skilaboðum til stjórnvalda í Venesúela. Á Twitter skrifaði hann í gærkvöldi að hótanir eða ofbeldi gegn Juan Guaidó, sem hefur lýst sig forseta landsins, eða gegn bandarískum stjórnarerindrekum muni verða svarað af fullum þunga.

„Ofbeldi eða hótanir gegn bandarískum stjórnarerindrekum, Juan Guaidó lýðræðislegum leiðtoga Venesúela eða þjóðþinginu er alvarleg árás á lög og reglu og mun hafa umtalsverðar afleiðingar.“

Skrifaði hann á Twitter. Hann sagði einnig að Bandaríkin viti vel að her Maduro, forseta Venesúela, sé stýrt af liðsmönnum kúbanska hersins.

Á undanförnum dögum hafa sífellt fleiri ríki lýst yfir stuðningi við Juan Guaidó og viðurkennt hann sem leiðtoga Venesúela eftir að hann útnefndi sig forseta fyrir framan mikinn mannfjölda í höfuðborginni Caracas.

Nicolas Maduro var fyrr í mánuðinum settur á ný í forsetaembættið til næstu sex ára en hann sigraði í forsetakosningum á síðasta ári en stjórnarandstaðan hunsaði þær og stór hluti alþjóðasamfélagsins viðurkennir ekki réttmæti þeirra. Mike Pompeo, utanríkisráðherra, Bandaríkjanna hvatti í gær öryggisráð SÞ og alþjóðasamfélagið til sýna Guaidó stuðning.

„Það er löngu kominn tími til að styðja íbúa Venesúela og viðurkenna nýja lýðræðislega ríkisstjórn undir forystu Guaidó.“

Sagði hann meðal annars og tók skýrt að annaðhvort styðji ríki heims „frelsisbaráttuna“ eða stjórn Maduro. Um helgina gáfu Frakkland, Bretland, Þýskaland og Spánn Maduro átta daga til að boða til kosninga, að öðrum kosti muni ríkin viðurkenna Guaidó sem leiðtoga Venesúela. Stjórnvöld í Ísrael fylgdu síðan í kjölfarið með samskonar yfirlýsingu.

Það þarf ekki að koma á óvart að stjórnvöld á Kúbu hafa sakað Bandaríkin um að vera að undirbúa valdarán í Venesúela og þá hafa Rússar gagnrýnt Bandaríkin fyrir afskipti þeirra af innanríkismálum landsins.