Það hefur ekki verið neinn skortur á tilgátum um ástæðu þess að MH370, frá Malaysia Airlaines, hvarf skyndilega af ratsjám eftir flugtak frá Kuala Lumpur og hrapaði síðan í hafið þegar vélin var á leið til Peking þann 8. mars 2014. Nú hafa flugsérfræðingar komið fram með nýja ótrúlega kenningu.

Laumufarþegi gæti vel hafa rænt vélinni og flogið henni í hafið og þar með tekið 239 farþega og áhafnarmeðlimi með sér í dauðann. New York Post skýrir frá þessu.

Brak úr flugvélinni hefur skolað á land í Madagaskar og í austurhluta Afríku. Það sem skolað hefur á land er þó aðeins lítill hluti vélarinnar, meirihluti hennar er enn ófundinn, þrátt fyrir mikla og endurtekna leit.

Flugsérfræðingurinn Tim Termini bendir á fjóra möguleika á því hvernig ránið hefði getað farið fram:

Í fyrsta lagi gæti MH370 hafa verið rænt af einhverjum í áhöfninni.

Annar möguleiki er að farþegi hafi rænt vélinni.

Í þriðja lagi nefnir hann möguleikann á laumufarþegar og að síðustu að vélinni hafi verið rænt af einhverjum á jörðu niðri.

Philip Baum, frá tímaritinu Aviation Security International, styður kenninguna um laumufarþega, þrátt fyrir að margir embættismenn hafi ekki tekið  þessa tilgátu trúanlega. Hann segir að laumfarþegi geti vel hafa borið ábyrgð á hvarfi vélarinnar.

Það eru þó ekki margir sem taka undir þessar hugmyndir. Algengasta tilgátan er að hinn 53 ára gamli flugmaður vélarinnar, Zaharie Ahmad Shah, hafi flogið vélinni í hafið, en talið er að flugmaðurinn hafi verið þunglyndur eða í andlegu ójafnvægi.